Mae Archwilydd Cyffredinol Cymru wedi cyhoeddi ei farn a'i adroddiad ar gyfrifon Llywodraeth Cymru ar gyfer 2024-25.

Mae wedi rhoi amod ar ei farn wir a theg ar ased benthyciadau i fyfyrwyr Llywodraeth Cymru oherwydd na all benderfynu a yw'r amcangyfrif gwerth teg ar 31 Mawrth 2025 yn rhesymol.

Asedau net Grŵp Llywodraeth Cymru a adroddwyd ar 31 Mawrth 2025 oedd £37.7 biliwn. Wedi'i gynnwys yn y balans hwn mae ased benthyciadau i fyfyrwyr o £8.9 biliwn, h.y. gwerth y benthyciadau i fyfyrwyr yr amcangyfrifir eu bod i’w had-dalu.

Mae cyfrifo'r ffigur hwn yn cynnwys modelu cymhleth. Mae Llywodraeth Cymru wedi addasu ffeiliau modelu a ddarparwyd rai blynyddoedd yn ôl gan yr Adran Addysg (DfE).

Nododd yr Archwilydd Cyffredinol bryderon ynghylch digonolrwydd y model hwn sydd bellach yn heneiddio wrth gynhyrchu amcangyfrif rhesymol. Y bwriad oedd i Lywodraeth Cymru sy'n gweithio gyda'r Adran Addysg o dan Gytundeb Lefel Gwasanaeth y 4 Gwlad drosglwyddo i fodel mwy diweddar yn 2024-25, ond daeth Llywodraeth Cymru i'r casgliad na ellid ei brofi a sicrhau’r ansawdd yn ei gylch mewn pryd i gynnwys allbynnau yn natganiadau ariannol 2024-25. Felly, defnyddiodd Llywodraeth Cymru yr unig fodel a oedd ar gael ar y pryd i gynhyrchu'r datganiadau ariannol drafft.

Amlygodd ei adroddiad yn 2021 ar Gyllid Myfyrwyr i Lywodraeth Cymru amcangyfrif yn 2015-16 y byddai'n adennill 81c am bob £1 sy'n ddyledus drwy fenthyciadau i fyfyrwyr. Erbyn 2019-20 roedd yr amcangyfrif hwnnw wedi gostwng i 65c. Ar hyn o bryd mae ad-daliadau gwirioneddol tua 50% o'r rhai a ragwelir ar hyn o bryd o dan y model presennol. Felly, mae'n debygol y bydd y model newydd yn arwain at werth asedau benthyciadau i fyfyrwyr sylweddol is yn 2025-26 a allai fod â goblygiadau i bolisi o ran cyllid i fyfyrwyr yn y dyfodol.

Hyd yn hyn mae Trysorlys EF wedi ariannu'r cynlluniau o ran benthyciadau i fyfyrwyr yn llawn ar y sail bod costau'n debyg ar draws y pedair cenedl.

Mae Llywodraeth Cymru yn bwriadu mabwysiadu'r model newydd yn 2025-26.